良心發現，總好過埋沒良心。1937年，來自日本京都嘅東史郎被徵召入伍，編入到中國戰場嘅日本軍隊，參與攻佔天津、上海、南京、武漢等戰役。東史郎一向有寫日記嘅習慣，記低咗日軍於中國燒殺搶掠嘅實況，後嚟佢將日記內容整理成書，向世人揭露日軍當年嘅殘暴，成為大眾了解侵華戰爭、南京大屠殺真相嘅其中一筆史料。

東史郎嘅日記記錄咗日軍如何視人命如草芥。1937年12月21日，身為士兵嘅東史郎於南京最高法院馬路對面，見到附近有架車反轉咗，而戰友橋本光治同埋其他同袍蝦緊一個中國人。後嚟橋本提出一個毫無人性嘅提議：將個中國人放入袋，然後淋油同點火焚燒。

成班日軍執行橋本嘅提議，於是個中國人喊住咁被裝咗入袋，拼命掙扎同呼叫都無用。橋本同其他同袍封住袋口之後，當嗰袋係足球咁踢嚟踢去，又好似同蔬菜施肥咁對住個袋痾尿。東史郎記載，稍微有良心嘅士兵皺曬眉咁望住依一幕，而有啲完全無人性嘅，居然覺得有趣，仲鼓勵同袍嘅瘋狂行徑。

橋本之後用架車嘅汽油淋落個袋度並點火，袋入面發出令人毛骨悚然、地獄般嘅慘叫，並嘗試於地上打滾。橋本對住個袋講，「嫌熱我畀你涼爽吓」，跟手綁咗兩個手榴彈落袋，並連人帶袋掟落池塘。「嘭！」手榴彈爆炸，無幾耐水面恢復平靜，日軍眼中嘅「遊戲」結束。而一條無辜嘅生命被殘殺，沒入湖底。

1945年8月，東史郎於上海向中國軍隊投降，之後返到日本。後嚟日記公開，東史郎去過中國七次，為自己犯下嘅罪行向中國人道歉同懺悔。不過，日本有右翼團體企圖否定南京大屠殺嘅歷史，仲將東史郎告上法庭。東史郎敗訴後揚言，會繼續告到聯合國，以維護大屠殺嘅歷史真相。即時年事已高，佢仍然到南京、北京、沈陽、上海等地作証，反省同講述當年日軍侵華嘅歷史。2006年1月3日，東史郎逝世，為大家留下指證日軍暴行嘅日記。

左圖為東史郎當年與細佬合照。網上圖片